“Хөдөө аж ахуйн бирж” ТӨХХК-ийн Гүйцэтгэх захирал Х.Отгонбаяр, “Монголын арьс ширний үйлдвэрлэлийн холбоо”-ны Ажлын албаны дарга А.Даваасүрэн болон “Монголын ноосон бүтээгдэхүүн үйлдвэрлэгчдийн холбоо”-ны Тэргүүн Б.Ганбат нар 2025 оны 3 дугаар сарын 14-ний өдөр “Хамтран ажиллах санамж бичиг” байгууллаа.
Тус “Санамж бичиг”-ийн зорилго нь Монгол Улсын Их Хурлын 2024 онд 63 дугаар тогтоолоор баталсан “Малын гаралтай түүхий эдийг боловсруулах үйлдвэрлэлийг дэмжих ”Цагаан алт” хөдөлгөөн”, Монгол Улсын Засгийн газрын 2024 оны 166 дугаар тогтоолоор баталсан “Шинэ хоршоо хөдөлгөөн” болон хөдөө аж ахуйн салбарын урт, дунд хугацааны хөгжлийн бодлогыг тогтвортой хэрэгжүүлэхэд малын гаралтай түүхий эдийн нөөцийг зохистой ашиглах, экспортын баримжаатай бүтээгдэхүүний үйлдвэрлэл, үнэ цэнийн сүлжээг хөгжүүлэх, салбарын эдийн засгийг тогтвортой өсгөх, тэр дундаа арьс шир, ноос, ноосон бүтээгдэхүүний зах зээлийг тэлэх, бүтээгдэхүүний нэр төрлийг нэмэгдүүлэх, экспортыг шинэ шатанд гаргахад хамтын ажиллагааны үр дүнтэй үйл ажиллагааг бүрдүүлж, холбогдох дэмжлэг үзүүлэхэд оршино.Талууд энэхүү “Санамж бичиг”-ийн хүрээнд “Хамтран ажиллах үйл ажиллагааны стратеги төлөвлөгөө”-г боловсруулж, түүний хэрэгжилтийг ханган ажиллах юм.
